Feira de Economía Social 2015

De novo outra edición da Feira de Economía Social na Coruña este pasado sábado 30 de maio. O tempo pasa voando! e o ano pasou case sen decatarnos... Como é habitual foi unha xornada moi amable e agarimosa; con tanta xentiña coñecida e querida ao redor. Desta volta foi feira-feira con moitas artesanas mostrando o seu traballo e poucas charlas e actividades; organizar eventos de este tipo é un traballo de moito mérito, sobre todo cando se fai de maneira voluntaria regalando tempo e traballo para que outras disfrutemos dun día grande no centro da cidade. Agradecer á organización o seu esforzo, foi un día marabilloso.

O sol tamén acompañou ... acompañoume sobre todo a  min que acabei queimada como unha gamba e co nariz tipo "don pimpóm".

Desta volta as enerxías non daban para preparar un taller para as nenxs, unha mágoa... pero seguro outro ano haberá forzas e compensaremos as ganas!

As enerxías se recargan con tantas visitas agarimosas recibidas!! e con compañeirxs de feira tan lindxs!! O ano próximo seguro nos atopamos de novo!

Obradoiro de luvas en Sualá

Se estás interesada/o en aprender a calcetar en redondo con 5 agullas, non te perdas este obradoiro!
Empezará o xoves 21 de maio ás 18:00h, ata as 19:30h, na tenda de lás Sualá, na esquina da Rúa Nova coa Praza da Soidade, en Lugo.
Podes apuntarte ata o mesmo día que empezamos o obradoiro.
E si prefires noutro momento pregúntanos, porque haberá outros sempre que teñamos persoas interesadas.

Obxectivos do obradoiro:

• Aprender a calcetar en redondo con 5 agullas
• Facer as nosas propias luvas

Non se realizarán puntos complexos, unicamente elástico 1:1 e punto xersei, posto que o obxectivo é afacerse a calcetar con 5 agullas e aprender o modelo para facer luvas.

Requisitos:

• É necesario saber calcetar previamente con 2 agullas.
• Para poder cumplir os obxectivos do obradoiro as/os participantes deberán completar traballo entre clase e clase na súa casa. Daránselles as indicacións necesarias. Para quen vaia con máis lentitude poden establecerse posibilidades de ampliación do obradoiro.
  
  
  Materiais que debe aportar a persoa participante:

• Paquete de 5 agullas para calcetar en redondo (recoméndanse as de 4 mm pero tamén poden ser algo máis finas).
• Lá do grosor correspondente ás agullas.

Duración do obradoiro e datas:

Realizarase un día á semana, os xoves, durante 1 hora e media, de 18:00h a 19:30h ao longo dun mes (prolongable ata dous meses).

Custe do obradoiro:

O prezo será de 15 euros ao mes.

Lugar de realización:

Tenda de lás Sualá (Rúa Nova esquina Praza da Soidade).

Contacto:

• Lucía Medina Navarro (ReciclArte): reciclarte.lucia@gmail.com
• Susana (Sualá): Tlfn. 982 23 16 20

Día do Comercio Xusto en Lugo

O martes 12 de maio compartiremos feira cos produtores habituais do Mercado da Terra e coa Cova da Terra, Bico de grao, Axunica, Taller de Solidaridad, Asemblea de Cooperación pola Paz e Mans Unidas, ademais dunha morea de amigas e amigos, para celebrar en Lugo o Día Internacional do Comercio Xusto.
Estaremos no Mercado Municipal de Quiroga Ballesteros durante a tarde, de 16:00h a 20:00h.
Pásate a visitarnos!
Pon a túa pegada polo Comercio Xusto!